周末去荷里活廣場 歎台灣農莊鮮味

數數手指，原來黛安已經有兩年無去過台灣喇，真係好掛住嗰邊嘅美食呀！好彩黛安知道荷里活廣場聽日同後日會同台灣觀光協會搞「台灣農莊嚐『鮮』美食節」，可以食到台灣10間頂級農莊或單位、以9月最當造嘅蔬果同水產炮製嘅至鮮饗宴。一定要去擦餐勁，安撫下我對美食嘅思念之情呀！

黛安梗係要八卦定到時有咩食啦，除咗必食蚵仔麵綫，仲有台灣純土鳳梨造嘅鳳梨優格蛋糕、金鑽鳳梨蜜汁雞柳、糕點等分別嚟自宜蘭、苗栗等地嘅農莊美食！場內唔止有得食仲有得煮，4位農場業者會親臨現場嘅「農莊DIY教室」教整地道創意便當、地瓜大福、整檜木筷子等。