《晴報》麥社長帶隊 品嘗鼎爺私房菜

平日睇《阿爺廚房》，黛安都好羨慕譚玉瑛姐姐可以第一時間試食鼎爺的手勢。好在最近鼎爺開咗間私房菜館，令電視機前的朋友可以大飽口福。據講現時訂枱要出年先食到，不過《晴報》社長麥華章就犀利囉，居然第一時間訂到位，前晚聯同約50位《晴報》友好一齊去試菜，有份出席的黛安對鼎爺煮的餸非常期待。

當晚宴會在鼎爺私房菜館的VIP房舉行，間房設計無得彈，事關廚房同飯廳只有一塊玻璃之隔，大家可一邊食飯，一邊觀賞鼎爺的精湛廚技。而老闆鼎爺亦好識做，飯前飯後親自招待、與來賓合照，席間又會由廚房走出嚟問大家意見，親民好客，氹得大家好開心。

食物方面，當然無令大家失望啦！簡單如荷葉飯都寧舍好味，原來內有乾坤。平日食到的荷葉飯，只有一片乾的荷葉包裹；而鼎爺則在乾荷葉之內，加多一片新鮮的荷葉包飯，令飯粒進一步吸收荷葉的鮮香，難怪食落更有層次感！

歎懷舊甜品「仙翁米」

美食當前，點可以無酒飲？當晚人人都應大會要求，帶一支酒來赴宴，香檳、白酒、紅酒樣樣有，黛安與旅發局的Cynthia、工銀亞洲的Angela、帝苑酒店的Heidi、馬伯樂的Angel、九倉的Agnes和Catherine，仲有《晴報》專欄作家查小欣及黃詩詩等又飲又食，樂得開懷。

當晚鼎爺仲特別為麥社長炮製一道「仙翁米」做甜品，呢道菜係六、七十年代壽宴必食菜式，所謂「仙翁米」其實係水藻，口感爽滑有嚼勁，好好味。臨走黛安同鼎爺講，好佩服佢年屆70仲咁有活力，自愧不如，會以佢為榜樣，朝住目標努力keep going！