港人助人踴躍 捐款扶貧亞太區第三

助人為快樂之本，雖然生在富裕社會，但港人對貧困同飢餓都唔會視而不見。Mastercard就趁噚日國際慈善日，發表咗《道德消費行為及慈善捐贈報告》，原來香港有60.2％人捐過錢畀慈善團體，比舊年嘅53.6％再進一步；而且在亞太區裏面排第三，僅次越南同泰國，成為最樂於捐款嘅地區。

睇番個報告，香港人唔止樂於捐，而且捐得唔少㗎，有60％人話每年最多肯捐$780；而且最多人支持捐畀處理貧困同飢餓扶貧議題嘅機構，佔27.2％；其次是兒童教育同健康，以及嚴重疾病議題，分別佔成26.9％同22.3％。不過，捐還捐，黛安都要提下大家，如果經網上捐款，要特別留意捐款網站有無標示「綠色安全鎖」，同埋要避開用滙款公司或銀行直接滙款，如果唔係捐錯畀可疑網站，就好難追得返。