吉野家勤學大賞 冠軍贏$2萬獎學金連機票

依家的學生真係好叻，思辯能力都好強。話說黛安昨日出席咗《晴報》有份策劃、吉野家主辦的勤學大賞2017，活動今年已經係第六屆舉辦，今年大會以「大香港小導遊」為主題，請中、小學生就此題目獻策，諗下自己會帶海外遊客參觀哪些香港景點，以及品嘗甚麼特色食物。

台風淡定 組織力強

想贏呢個比賽都唔係咁易㗎！參賽者先要撰寫一份計劃書，評審會按住內容，於每個組別挑選十位學生進行分組辯論，講下自己的睇法。

黛安發覺雖然部分參加者人仔細細，只得八、九歲，但就台風淡定，講解清晰，組織能力完整，對香港的旅遊景點及特色食物都好有諗法，例如有人提到會帶旅客去黃大仙祠及志蓮淨苑參觀，另亦有人提議去飛鵝山睇風景、入西貢食海鮮等，想法多多。

另外，黛安喺現場仲見到由吉野家高級市場經理唐智鴻（Winnie）、國泰航空企業事務總監梁月芳（Carolyn）及《晴報》總編輯潘少權（Joel）組成的評判團，佢哋聽完所有人辯論後，都不約而同給予小學組的王顥臻及中學組的李毅最高分，成為有關組別的冠軍。黛安見到司儀宣布李毅得獎一刻，佢表現得一臉錯愕，可能佢都無留意到自己其實表現得好出色。兩位得獎者不但可獲得$20,000獎學金，仲獲國泰航空送出3張免費來回台北機票，可以帶埋屋企人去旅行。

活動之後，黛安感受好深，覺得呢批學生的確好優秀，亦對吉野家連續六年舉辦及贊助比賽，感到好有意義。而國泰Carolyn亦同黛安講，活動令佢有機會聽下同學仔分享，與學生彼此交流，作為評審嘅佢亦非常享受今次過程。