黃埔AEON 今起10日低至3折特賣

黛安放假好鍾意行AEON，貪佢逢星期三有特賣日之餘，仲成日搞感謝日。作為忠實粉絲，黛安成日都望實佢有咩優惠。好似AEON STYLE黃埔就搞咗個1周年感謝周，今日起一連10日全場貨品低至3折！

講明全場特價，真係由廁紙到電器都有得減。黛安就睇中咗好hit的韓國品牌SKINFOOD出的黑芝麻深層清潔面膜，畀$70就可帶返屋企，仲有Casablanca法蘭絨毛毯都只係賣$50，最啱入秋天氣涼拿來冚住煲劇；跟手買埋$99.9的600ml虎牌保暖咖啡杯，無「暖男」都可過到暖冬啦。

同場仲有「日本鳥取岡山觀光物產展」，安排鬼太郎同柯南到場；仲可食住香印提子同鳥取和牛邊抽獎，喺物產展買夠$150，仲隨時抽到雙人來回鳥取機票！

行完AEON，行兩步過黃埔新天地「九號水產」，9月10號當日仲有機會見到近期人氣急升嘅「鼎爺」教大家買靚海鮮同煮餸。即日起該處多間商舖更推超值優惠，期間限定$10歎北海道元貝、新鮮生蠔等，令人食指大動，定必掀起搶購潮。