百佳引入日本白鸛米 製飯糰搞試食

近排有唔少食品被驗出有「毒」，搞到黛安食飯嗰陣都提心吊膽呀！而為咗令市民食得安心，百佳超級市場就獨家引入一款嚟自日本兵庫縣豐岡市、不含農藥嘅白鸛大米，於旗下指定Fusion、Taste、GREAT Food Hall及SU-PA-DE-PA分店發售。黛安知道，白鸛大米係以「可持續農法」種植，令白米粒粒分明、米香豐富，仲係豐岡市引以為傲嘅產品嚟㗎！

為咗隆重其事白鸛大米登陸香港，百佳特意請嚟日本兵庫縣豐岡市農林水產課嘅代表團，於金鐘太古廣場GREAT Food Hall（即日至17/8）及九龍塘又一城Taste（18-20/8）向港人介紹兼試食白鸛大米。聽講，隨團嘅日本廚師仲會即場利用白米配以三文魚碎同牛肉等食材製作飯糰𠻹！啱晒一眾為食嘅港人呀！