小熊維尼限定店 荃新天地開幕

要數迪士尼嘅經典卡通，一定唔少得小熊維尼！荃新天地就知道香港有唔少「Pooh粉」，所以會喺今日（10日）至8月27日，於荃新天地1期中庭開設「小熊維尼期間限定店」，到時將會售賣超過200款嘅Pooh Pooh精品。靜靜雞話你知，當中有唔少產品係首度喺香港獨家推出㗎！

其中包括由英國插畫家謝培德所畫嘅「經典小熊維尼」系列明信片、布袋、同親子T恤等。黛安知道，「經典小熊維尼」嘅鋼筆綫條明顯，而且畫風細緻，同平日常見、着上紅色上衣嘅「小熊維尼」係有少少分別㗎，所以收藏價值可以話係非常高！另外，如果你係CitywalkCard會員，仲可以憑積分免費換領全球限量嘅「經典小熊維尼」旅行頸枕𠻹呀！唔講住啦，黛安要出發去搶購獨家精品啦！