迪士尼搵大專生設計植物導賞

唔講唔知，原來開幕一個月嘅香港迪士尼探索家度假酒店，栽種咗700種共17萬棵植物，包括1,000棵大型喬木咁多㗎！香港迪士尼CEO劉永基同黛安講，成個度假區有超過100萬棵植物，而新酒店嘅綠化率接近60％，為咗等更多人認識唔同品種植物，今次特登同推動環境保育、青少年發展嘅珍古德協會香港合作，推出「探索綠悠遊」教育項目！

新項目主要鼓勵年輕人投入大自然，所以未來一年，150位來自東涌和新界西嘅中學生，將由一班大專院校嘅學生帶領，參與植物導賞團及工作坊，學習同了解唔同花草樹木嘅特性，親身考察及主導設計，利用佢哋最擅長嘅電子科技，規劃記錄多條以氣候、顏色或唔同感官元素等主題來分類嘅大自然導賞徑，透過app分享畀度假區同大嶼山遊客，實行一齊享受綠色旅遊體驗！