與AlphaGo創辦人交流 電腦戰棋王 誠哥都捧場

最近人工智能AlphaGo戰勝世界排名第一嘅中國棋手柯潔，仲獲得中國圍棋協會授予職業圍棋九段稱號，成為最hit話題之一。噚日黛安喺李嘉誠基金會微博，見到長和系主席李嘉誠好認真咁睇緊呢場人機大戰，莫非誠哥對圍棋都有研究？

睇真啲，原來誠哥身旁仲有開發AlphaGo嘅人工智能公司DeepMind兩位創辦人，分別係Demis Hassabis同Mustafa Suleyman。黛安四出打聽，原來Demis同Mustafa上星期五嚟咗香港為誠哥「上堂」，講解人工智能研究方向以及各種應用階段成果，誠哥仲好認真咁準備好晒紙筆，一邊聽一邊摘錄筆記。聽講喺「上堂」期間，Demis對政府政策點樣可以支持同平衡人工智能發展有自己嘅洞見，亦對人工智能用喺國防以及武器發展不無顧慮，誠哥聽到好激動，仲幾次聽到企起身，搞到兩位創辦人都即刻禮貌咁「陪企」，場面相當搞笑。

從棋局發現盲點

黛安聽講誠哥平時都會睇AlphaGo嘅圍棋賽，亦會閱讀相關嘅評論文章，佢仲同身邊嘅同事講，睇AlphaGo比賽同文章有種「當頭棒喝」嘅體會，覺得有時人會有「理所當然」嘅盲點，陷於自以為是，呢個正正就係「停滯不前」嘅原因和「走進未來」嘅負累。從沒想過一場棋賽可帶來咁深嘅反思，今次黛安又從誠哥身上學到嘢了。