麥當勞傳訊一姐 諗計做好慈善環保

電影《蜘蛛俠》有句金句︰「能力愈大，責任愈大。」但其實邊止超級英雄，今時今日做大企業，有一流社會責任意識都好緊要。黛安上個禮拜去記協49周年晚宴，就撞到麥當勞的「傳訊一姐」、企業傳訊高級總監林婉梅（Wendy）。原來嗰晚Wendy都好有心，朝早「馬拉松」式開完會直落就嚟晚宴，可謂做到無停手。

減少光害 提升籌款關注

不過麥當勞啱啱先出完「是拉差辣脆雞」新包，有乜咁忙先？唔通嚟緊又有勁爆新口味？Wendy就話除咗諗計整新產品，仲要花啲心思諗下點體現企業社會責任㗎。好似依家社會重視咗環保，麥當勞都有10％分店簽咗《户外燈光約章》，齊齊熄燈減少光害︰「我們好多舖頭在戶外，始終難啲熄晒燈，但都改善咗燈光配套，依家24小時店都唔再用幻彩變換燈光吸客。」

除咗硬件，又點少得一顆關懷的心。Wendy連搞慈善活動都諗得好周到，好似每年都好受小朋友歡迎的麥當勞兒童愛心馬拉松，今年都順應家長要求從善如流︰「天氣熱怕小朋友焗親，凍又怕吹到，所以今年想在天氣較穩定的11月先搞。」Wendy仲話，留意到放係舖頭度幫麥當勞叔叔之家籌款的錢箱，近年都變咗「裝飾品」，要諗計谷番關注度咁話。黛安查過年報，麥當勞叔叔之家2015年的盈餘的確比上一年少咗160萬左右，Wendy要努力幫啲病童同佢哋家人啊。