迪士尼新酒店開幕 樂園下月大搞Marvel活動

香港迪士尼全新嘅探索家度假酒店，噚日正式舉行開幕禮喇！黛安有幸見證呢個歷史時刻，迪士尼CEO劉永基話，迪士尼源源不絕打造新體驗，希望可以吸引更多本地同海外客人到訪，而由即日起，入住三間酒店其中一間，都可玩盡另外兩間酒店嘅康樂活動同設施，同時會獲贈指定園內設施優先入場證，甚至可預留座位欣賞劇場表演㗎！

佢特別提提一眾漫威（Marvel）粉絲，樂園由6月14至9月3號會推出「Marvel夏日超級英雄」主題活動，除鐵甲奇俠，大家仲可以同美國隊長、蜘蛛俠見面，而展藝館亦會有以香港做背景主題嘅漫威主題體驗，讓粉絲們置身於漫威世界，盡情狂歡呀！