着旗袍聽導賞 探索「舊城中環」

「下次外國朋友來香港，我都要帶佢哋嚟呢度！」上周末黛安跟旅發局到中上環走一趟，發掘了很多驚喜處處的景點。事緣旅發局以「舊城中環」為題，設計了5條充滿本地特色的旅遊路綫。當日帶我哋四圍走的導遊阿Paul（陳智遠）係活現香港創辦人。讀law出身的他有律師唔做，先後做過學者同政治助理，後來嫌悶，就做起本地文化遊來。

歎手工啤 參觀印廠

講起當日行程就緊湊咯！首先阿Paul帶我哋去咗雜貨店「朱榮記」，它位於水坑口街（Possession Street，佔領街），街名反映出香港被殖民的歷史。舖頭雖小但五臟俱全，無論你想搵火水爐、鐵製痰盂或舊式豬仔錢罌，一樣可以喺呢度搵到。

行行下有啲口乾，阿Paul帶大家去飲啤酒。走入太平山街的「Craftissimo」，儼如闖進啤酒博物館。老闆唔單止搜羅世界各地的手工啤，更有售自釀美酒。黛安試咗其中一款，味道較平日飲開的啤酒澀，亦富麥香，感覺幾特別。

講到黛安最鍾意一站，就要數太平山西街的「光華印務」了！第二代掌舵任老闆，50幾年前已跟爸爸學活字印刷。當日他更為每位參觀者送上一本印有其名字的筆記簿，十分窩心，黛安愛不釋手！

最後來到旗袍店「嫣裳記」，創辦人阿Ding去完日本京都旅行後，有見當地人將和服出租予遊客，回港後照辦煮碗入手一批旗袍和長衫出租，成功締造商機！