英國老品牌Sainsbury's 登陸Market Place

黛安放假都會煮下飯仔，呢幾日就係Market Place by Jasons見到一個英國老品牌Sainsbury's嘅產品，真係令人眼前一亮！地道英式餅乾、咖啡、蔬菜等，真係好似去咗英倫咁，即刻入咗唔少貨。

喺香港有時候想買一啲外國食材，好多時候都未必有，依家Sainsbury's登陸香港，隨時煮個英式breakfast都無問題啦！當日黛安仲喺現場見到十優港姐麥明詩，佢仲同英國名廚Tom Burney合作，以Sainsbury's產品炮製鯖魚紅椰菜撻𠻹。等黛安返屋企都照辦煮碗，試下整先！

話說呢個牌子喺英國有成148年歷史，聽公關姐妹講，今次雙方合作，會將超過200款食品放喺Market Place同牛奶公司旗下指定超市獨家發售。特別推介金裝即溶咖啡，用意大利羅布斯塔和阿拉伯咖啡豆做，淡淡果香同拖肥嘅甘甜，愛咖啡嘅你唔好錯過。