陳文剛執導《天虹戰隊》 無障礙劇團演出具挑戰

身體殘障無礙追求夢想，最近黛安就知道糊塗戲班旗下嘅「無障礙劇團」，今年就排演咗一套舞台劇《天虹戰隊》，安排一眾有視障、智障等困難嘅演員齊齊踏台板，真係好有意思。

輪椅齊跳舞 走位考功夫

黛安聽舞台劇導演陳文剛講，演出最大嘅難度之一，係要同時安排7、8部輪椅上台『跳舞』，需要嘅空間大，出入台嘅走位好考功夫。「有演員本身視障，但要扮演有正常視力嘅角色，走位時要工作人員協助，但又要令觀眾感到他是自己行，都要幾巧妙㗎。」

另外佢又提到，演員嘅演出經驗較少，需要多花時間揣摩角色，好彩最終能趕上進度︰「有智障演員因怕記不到對白，主動話想做閒角，因閒角得一句對白。但我們都安排番他做原本嘅角色，最後他第一個背晒對白！但有時他會記錯次序，講咗上一個場口嘅對白，搞到大家忍唔住笑。」

聽完陳文剛介紹，黛安都對部劇好有興趣。如果大家想支持下呢個劇團，不妨買飛入場觀看。門票由$80起，另設$680慈善票，收益將撥捐作劇團嘅海外交流基金，以便演員考察國外的無障礙設施及相關戲劇演出做法等。