美食車首推$68「自助餐層層疊」

今年2月開始營運、由豪園麵家第二代傳人梅樂文主理嘅「豪園小食」美食車，嚟緊5月15日到28日進駐九龍東了﹗佢哋仲特登推出「自助餐層層疊」益街坊（只限5月21及28日，2-5pm），食客畀$68就可以任疊12款小食飯麵，包括咖喱魷魚、茄牛意粉、招牌蠔丸、西多士、炸一字雞翼、芋泥春卷等，成功在指定紙盒上疊好啲餸，就可以疊幾多攞幾多，考驗技巧和智力；幫襯仲送一杯「檸茶BB」𠻹。

另外，「豪園小食」亦推出$38抵食下午茶套餐，有得食春卷、蠔丸、雞翼及西多士各2件，晒足料，肯定食到捧住肚仔走啦。跟住美食車會喺5月29日至6月11日去返迪士尼樂園，6月12日至25日去返尖沙咀梳士巴利花園。