渣打慈善跑有噱頭 設「前世情人賽」

每年渣打馬拉松報名人數都好踴躍，不過錯過咗都唔緊要，一家大細玩喺7月23日舉行嘅「渣打慈善家庭跑」咪一樣咁開心﹗

22/5接受報名

黛安噚日獲邀出席活動啟動禮，會上除咗有渣打大中華及北亞區行政總裁洪丕正及香港行政總裁禤惠儀，佢哋仲請咗食物及衞生局局長高永文，喺象徵同步向前嘅跑鞋模型裝置繫上彩帶，宣揚團結社會訊息𠻹！

講番今次「渣跑」，將會喺中環10號碼頭起步，沿中環海濱長廊跑出龍和道，以添馬公園作終點；活動分2公里賽及400米前世情人跑兩組賽事，小朋友一樣咁啱跑。今個月22日接受網上報名（www.putyourself.in/sc），6歲以上參加者捐最少$200就可參加了。

大會仲話，2公里賽事仲特設97壽星組，誠邀1997年出世嘅後生仔女參加，象徵香港跑過「回歸20周年」。同場仲會有免費合家歡嘉年華，有得玩水戰啦，扭氣球啦、臉部彩繪啦，同攤位遊戲咁，全部都好正㗎！