拎未過期食物去百佳 捐贈惜食堂

助人為快樂之本，大家今日做咗善事未？黛安有個好提議畀大家，事緣百佳超級市場同惜食堂第4度合作「全城傳愛齊捐食」計劃，全港百佳同旗下品牌約280間分店，將收集市民捐贈食物轉送到惜食堂，製作熱辣辣嘅飯餐畀社區有需要人士享用，等佢哋得到溫飽同時，感受社會嘅大愛！

由即日起至7月2號，將喺任何地方購買、任何品牌，又未過期、未開封嘅米、油、粟粉、米粉、罐頭、燕麥、冬菇同雲耳，交去任何一間百佳、Fusion、TASTE、International、Gourmet、GREAT或SU-PA-DE-PA超市內藍色嘅食物收集箱就得喇！百佳為鼓勵市民做多啲善事，特別推出「你捐一件佳之選，百佳再多捐一件」嘅配對行動。

過去3次捐食活動共為惜食堂籌集咗13萬件食物，連同善款，總值超過335萬港幣！百佳超級市場項目顧問曾金強話，2012年至今百佳已為惜食堂籌集965公噸食物，製作超過290萬個免費飯餐同31萬個食物包，仲打算將計劃拓展去150間分店同上水新鮮食品分發中心。