意大利數學型男博士 下周訪港 恨食一哥豬扒飯

高富帥又有學識嘅男神，唔只喺電視劇入面出現，仲有真人示範！之前網絡爆紅嘅28歲意大利型仔博士Pietro Boselli，有樣有身材之餘，仲要係數學教授，喺學校教書已經迷死唔少學生，佢嘅IG follower已經接近200萬人，下個星期三（10日）佢仲會嚟香港，為大家樂全新概念店揭幕，姊妹們又要尖叫了！

呢個靚仔教授有幾巴閉？聽講佢係英國UCL機械工程學系第一榮譽學士畢業，之後再讀博士，仲喺埋母校教埋書，身兼模特兒、私人健身教練、工程師，真係周身刀，仲幫過唔少國際品牌拍廣告同做代言人，真正嘅世界級筍盤。

今次可以請佢嚟香港嘅原來係大家樂，聽公關姊妹講係適逢尖沙咀星光行全新概念店開幕，破天荒同著名意大利咖啡品牌Segafredo合作，所以特意重金禮聘Pietro Boselli嚟揭幕，當日佢會谷行「老鼠仔」，拉住仿照意大利傳統交通工具貢多拉而製作嘅車，載住「十優港姐」麥明詩出場，相信兩位高材生定會擦出火花。

第一次來香港出席公開活動嘅Pietro Boselli話知道香港好多美食，而佢最想食嘅原來係大家樂焗豬扒飯，話想體驗下咩係快、靚、正嘅快餐。咁多美食引誘下，會唔會keep唔住身形㗎？佢就話會堅持運動，操好每一塊肌肉咁話！