恒生水哥出新書 分享跑步人生

有幾多人可以完成60多個馬拉松賽事？黛安認識一位「跑王之王」，佢就係人稱「水哥」嘅恒生銀行傳訊及可持續發展總監張樹槐（Walter），佢曾於五大洲完成60幾個馬拉松，仲係大中華區第一位完成珠峰馬拉松嘅跑手，認真厲害！最近同Walter傾開，知道佢出咗本新書《跑出一片天》，講點樣喺漫漫長跑路領悟人生同拓闊眼界。

Walter話新書唔單止講佢長跑嘅故事，仲會分享喺賽道上，點樣勉勵自己面對人生嘅順逆，「好多時喺賽道上跑到好攰，再跑唔到落去，但望住前面就嚟到終點嘅天空，就會擠出意志，再有舉步嘅動力」。新書分四章，包括跑道上、跑道旁、跑步情同跑步事，紀錄晒佢喺各地跑步嘅見聞，又會講下跑步經濟嘅潛力，內容豐富，黛安急不及待拜讀一下先得！