帶媽咪去主題樂園 又玩又食慶母親節

海洋公園和迪士尼都係好適合一家大細去玩，今年母親節和父親節，黛安打算約埋爹哋媽咪一起去「打卡」兼刷番餐勁，以表孝心。聽公關姐妹講，海洋公園今年搞6點後免費入場吃半自助晚餐，迪士尼就可住新酒店兼睇新show，一於兩個都去齊啦！

以前爹哋、媽咪就帶黛安去海洋公園玩，依家大個女啦，係時候帶番佢哋重遊舊地。公關姐妹話，海洋公園第一次搞免入場費嘅園內餐飲服務，即係今個星期六起至6月30號，每個星期六、日，只要喺網上預約book枱吃海龍王餐廳嘅母親節或父親節半自助晚餐，就可以喺晚上6點後免費入園任玩，人數不限，「book幾多人吃飯，就幾多人可免費入場玩，直至關門。」呢個優惠真係好驚喜！

另外黛安收到風，迪士尼重新打造咗一個「迪士尼明星嘉年華列車」，以迪士尼明星做主題，造型十分可愛活潑，小朋友見到一定好開心！玩完仲可以去迪士尼樂園酒店「晶荷軒」歎母親節套餐，午餐每位都係308蚊再加一，有6個餸兼送甜品，好抵啊！而且喺5月13至14號喺晶荷軒用膳，媽咪可獲贈一杯八寶茶，答謝佢一直貼心照顧屋企人。