陪check-in安檢再登機 同導盲犬一齊搭飛機

可以同導盲犬一齊上飛機？原來真有其事。廉航HK Express適逢前日（26日）國際導盲犬日，特登為香港導盲犬協會（HKGDA）安排一場實地登機體驗活動，黛安都有見證香港呢次史無前例嘅體驗呀。

48小時前 聯繫航空公司

HKGDA當日出動經過訓練嘅導盲犬，2位視障人士實地演練整個登機流程，仲大讚香港國際機場無障礙設施與服務一流。HKGDA發展主席遲淡寧話，其實導盲犬就等如視障人士第二雙眼睛，大小生活幾乎同導盲犬融為一體，「當日佢哋由2號客運大樓辦妥登機手續後，經過機場保安同海關檢查，搭無人駕駛列車到登機閘口登機。」上到飛機後，佢哋好細心聽機艙服務員嘅基本服務示範，之後就返抵港大堂，順利體驗成個登機程序喇。

遲小姐解釋，視障人士同導盲犬登機，其實同一般程序無分別，好似坐呢間航空公司咁，只需喺出發最少48小時前同佢哋聯繫就可以。HK Express商務總監Luke Lovegrove更拍心口承諾，會為每位旅客提供平等機會，無論有無特殊需要，都希望帶畀佢哋順暢同愉快嘅飛行體驗！