蛋黃哥3D八達通 明日$188發售

黛安要同鍾意「蛋黃哥」的姊妹們報喜！事關八達通卡有限公司推出全新「蛋黃哥」3D八達通配飾，「蛋黃哥」仲變身做「水煮蛋」和「蛋炒飯」兩款立體造型，返工搭車拎出來「嘟」一「嘟」心情都好啲。

「蛋黃哥」可愛在於佢懶散的神態，拍打「水煮蛋」的蛋殼，佢就會輕輕彈跳；將「蛋炒飯」放喺枱面輕推，佢就會左右搖晃。兩款成人版的「蛋黃哥」3D八達通配飾都有彈弓匙扣，方便姊妹隨身攜帶。想帶佢返屋企？明日起喺全綫OK便利店買到，每款售價$188，不設按金及儲值額。