海洋公園Chill Out過後 港產川金絲猴BB出世！

昨日收到來自海洋公園的喜訊，就係公園星期一（17/4）剛迎來第一隻在香港出世的川金絲猴BB！公關姊妹仲同黛安share咗幾張私密照片，只見BB乖乖躺在金絲猴媽媽的懷內飲奶，感覺好幸福。衷心祝願佢快高長大，健康快樂！

公園昨日將「香港賽馬會四川奇珍館」關閉，之後會視乎川金絲猴媽媽同BB的情況，畀佢兩母子增進感情，考慮其後兩至三天開放部分展館畀公眾參觀，大家記住留意呀。

傍晚入場 又食又玩

川金絲猴BB出世當日，正好係公園夜間美酒佳餚盛薈「Chill Out @ The South」的last day。查實黛安早兩日先至喺入面Chill Out一輪，若果唔係早排去咗宜蘭旅行，我應該更早就去湊熱鬧。當日黛安傍晚五點入場，玩咗兩個鐘頭機動遊戲，再去「海洋奇觀」歎美酒佳餚。

「海洋奇觀」水族館一到夜晚來個大變身，放滿high table，來賓除咗可以享用紅、白美酒、威士忌和其他酒類等，又可品嘗各試精緻小吃。其中一款煙肉帶子卷，廚師將煙肉捲住大大粒帶子入焗爐烤焗，既有肉香，又保留帶子的軟滑鮮甜，非常好吃。

當晚還遇到海洋公園CEO李繩宗在現場招呼朋友，黛安恭賀佢同一班同事諗咗個咁成功的活動出來，現場有很多美食、美酒攤檔，吸引遊客及居民夜晚入來玩，當中不乏帶住小朋友入場的家長；夜晚仲可以睇埋「夢幻水都」人工湖的《雙龍奇緣》的水幕表演，呢一晚認真精采呢！