周六啟德夜跑 齊助奧比斯

好多打工仔平時成日坐，收工跑下步絕對有益身心。不過一個人跑係悶咗啲，黛安就等緊今個星期六（8日），同班fd齊齊去啟德跑道公園參加「海航‧奧比斯跑向光明」呢個活動，邊跑邊打卡仲可以幫奧比斯籌款，一次過滿足晒3個願望啦！

不過公關姐妹話滿足度絕對唔止咁少，事關原來當日傍晚6點半活動大使張智霖（Chi Lam）都會到場，想「野生捕獲」佢就要一早set定機啦。而且每個參加者除咗有番條靚靚夜光手帶做紀念品，籌款額最高頭三位仲可以贏到香港快運來回機票，同埋康泰旅行社禮劵，真正實現「助人自助」。