炮製《美女與野獸》茶餐 餅廚︰玫瑰花慕絲最難整

High tea可以有幾精緻？香港迪士尼樂園酒店女餅廚陳恩楹（Vicki）造出嘅瑰麗下午茶，真係可以令各位大開眼界！Vicki同黛安講，為咗配合電影真人版《美女與野獸》上映，佢同團隊花咗3、4個月構思集視覺、味覺於一身嘅下午茶食譜，要好睇之餘，又要帶畀客人回到電影當中，真係少啲心思同時間都唔得呀！

好味又好睇 具挑戰

Vicki笑言，將電影元素、細節搬上餐桌，的確好考功夫同耐性，好似玫瑰花慕絲同檸檬曲奇咁，「最困難係玫瑰花慕絲，唔好睇好似好簡單，其實甩模時很容易會崩，而檸檬味嘅曲奇，因為黃色嘅緣故，大家就會諗起係女主角貝兒公主嘅禮服。」佢又透露，迪士尼嘅甜品與坊間糕餅最大分別係，迪士尼甜品主題鮮明，好味之餘又好睇，挑戰性的確高好多。

原來Vicki細細個已經好鍾意食甜品，讀大學嗰陣已想成為餅廚，仲講明想去迪士尼餅房實習，對於當時不設實習位嘅迪士尼，總餅廚見到Vicki誠意可嘉，最終都畀機會佢實現夢想。「最初媽媽反對我做餅廚，擔心我太辛苦，但我就好似貝兒公主勇往直前嘅性格一樣，勇於追夢、不半途而廢，媽媽都體諒我，仲好支持」。