阿倫玩中菜 鴻星真「阿叻」

上星期五黛安品嘗咗一餐好正的「五星級」盛宴。點解話係五星級？因為當晚黛安除咗見到阿倫（譚詠麟）、阿叻（阿百祥）兩粒巨星外，仲歎咗另一粒星廖碧兒（Bernice）推薦的酒，用膳地點是鴻「星」，加上有「星」級行政總廚周權忠師傅炮製佳餚，夾埋咪有「五粒星」囉！

眾所周知，阿倫向來識飲識食，至於點解會同鴻星合作搞品酒宴，鴻星詩姐話係無意中促成的美事！事緣阿倫一向係鴻星的熟客，舊年適逢係佢入行40周年，摯友馬達昌提議推出40周年限量版葡萄酒，可惜支酒面世前好友突然離世，阿倫為咗完成故友的心願，繼續推出。另邊廂，詩姐和Bernice則是考品酒師牌時的buddy，經常與鴻星太子女Candy把酒言歡。有次詩姐同阿倫傾開不如搞番場wine pairing，雙方一拍即合，搵埋阿叻和Bernice搞咗呢場「星之晚宴」。

薑醋沙律 阿倫大讚

周師傅話舉辦呢場飯局都有一定壓力㗎！事關食客要畀成$1,500入場，加上係同阿倫等名人合作，食物點都要有所突破，必須絞盡腦汁。結果佢當然不負眾望，其中一道沙律更獲阿倫大讚係「四両撥千斤」。你估下周師傅用邊種醋配沙律？相信你未必估到，因為他用的是大家想都沒想過的「薑醋」！沙律上還放有四粒豬油渣來提味，配鹹豬手和野菜同吃，令人耳目一新！

當晚除咗美酒佳餚，更加係星光熠熠，溫拿的彭健新及葉智強亦有到場，不少fans捉住偶像影相。此外黛安亦遇《晴報》社長麥華章，他飯前跟阿倫、查小欣、項明生密斟，原來是交換品酒心得。麥社長當晚還帶同攝製隊到場拍片，想知道詳情，記住留意《晴報》fb啦！

友誼永固秘方

由於阿倫係媽咪的偶像，所以黛安在媽咪耳濡目染下，亦變成阿倫的粉絲。上星期在阿倫fb睇到一條片，是阿倫和叻哥齊齊外遊滑雪，叻哥還表演心口碎大雪，令人笑不攏嘴。問叻哥點解同阿倫friend足咁多年？背後原來有段故：話說當年二人都是公屋仔出身，阿倫剛好儲下第一桶金想買樓，不巧叻哥生意急需資金周轉，阿倫當時二話不說將幾十萬首期借給阿叻，這份難得的情義，正是友誼長存不可或缺的因素。