旅行吵架 兩成男人一走了之？

「那個衰人！以後都唔同佢去旅行！」阿Pat與蜜運男友韓遊五日，三日吵大架，莫非真係相見好同遊難？

阿Pat個Case未算最差，前排網上旅行社zuji做了個千二人的調查，剖析男女旅行價值觀。其中一條問題正正問人旅行爭執點算好，你估班男人點答？有兩成人竟然選擇一走了之，撇下旅伴自己返港，認真絕情！好在小器港男只佔少數，超過一半（57％）男士都話會主動與摯愛和解，總算有風度。至於女士普遍採取逃避態度，近六成人選擇同伴侶「零交流」或分開遊覽，堅持完成旅程始返港；只有25％會主動氹番男友。

為靚仔靚女舊地重遊

不時聽見男同事於旅行過後談論異地美女，黛安一直以為他們只是「口花花」，沒想到「靚人」在男人心目中確有舉足輕重的意義。今次調查發現，超過六成男人會因「當地靚仔靚女多」而重遊舊地，女士的答案相對「正路」，55％人再訪皆因「喜歡當地文化」。

黛安聽zuji香港CEO黃澤禮（Charlie）講，港人最愛旅遊熱點首五位分別是台北、曼谷、東京、首爾及高雄；越南峴港亦愈受追捧，有望成新興度假勝地。Charlie不忘報捷說，去年zuji的預訂率有雙位數增長，真是可喜可賀。