迪士尼睇春季巡遊 覓限定花蛋

復活節食復活蛋是常識吧？想休閒踏踏青、度過夢幻假日，迪士尼是不二之選。園方就搞了開幕以來首個「迪士尼明星春日嘉年華」，今（16日）起至5月尾會上映全新的明星嘉年華列車巡遊，米奇、米妮等逾30個迪士尼朋友會齊齊換春裝出巡；園內仲擺咗過百隻以迪士尼朋友做主題的花蛋，黛安見到威猛的iron man同星戰主角變咗圓滾滾的花蛋都笑到停唔到口，咁cute一定要入場打卡儲齊一套啦。

趁住《美女與野獸》電影上映，貝兒公主同野獸都會登場同客人近距離會面。而「奇妙處處通」會員入場，每星期都可換到一款珍藏版「花蛋」徽章；7月14日前仲可以用$389幫朋友買飛入場𠻹！