南韓藝術家 海港城打造「仙境」

講起喺市區影靚相，好多人第一時間就諗起成日都有靚靚布置嘅海港城。黛安收到風，噚日起海港城會展出南韓藝術家金大城、權大訓、金起民同崔星喆的作品，仲係呢4位藝術家首次來香港設展𠻹，可謂極罕﹗其中金大城用咗愛麗絲夢遊仙境做主題，整咗《漫遊仙境》系列裝置係露天廣場展出；而權大訓就被德國哲學大師尼采啟發，創作咗一系列立體畫同雕塑，真係影相打卡都手軟。

4位藝術家噚日齊齊出席開幕禮，雖然曾經來過香港參加巴塞爾藝術展（Art Basel），但喺香港舉行獨立個展真係第一次，都話好開心！同場仲有大韓民國駐香港總領事金光東，佢話每年三月都係香港「藝術月」，藝術節目一籮籮，希望今次南韓藝術家來港設展交流，可以令香港不單喺經濟、貿易、旅遊上有傑出成就，更要進化成一個文化藝術樞紐！

4餐廳推Art Menu

公關姐妹仲話，海港城月底（24-26/3）會喺馬哥孛羅香港酒店舉辦Harbour Art Fair，以韓國藝術做主題，請咗逾50間畫廊展示頂尖同新晉藝術家作品，仲會有一系列藝術講座、藝術工作坊及品嘗會畀藝術同好聚一聚。

另外，海港城有4間餐廳都會推出特別的「Art Menu」，等客人睇得又食得，全面感受藝術氣息。