瓦努阿圖野豬牙首飾 戴妃米歇爾都有

一句經典的廣告語︰「瓦努阿圖，我想住嘅地方」，令不少人開始認識呢個地方。唔知大家有無留意瓦努阿圖嘅國旗，其中黑色三角形入面有豬獠牙嘅圖案，原來係因為當地有生產野豬獠牙（Boar Tusk）首飾，但因為產量極少，喺當地獠牙就象徵財富，就連英國王妃戴安娜同美國前總統夫人米歇爾都擁有！

野豬死後才取獠牙

黛安日前去會展嘅國際珠寶展睇首飾，並喺發現來自瓦努阿圖嘅參展商VANUATU BIJOUTERIE。聽負責人Tal Milfirer講，今次係佢哋首次應邀參展，仲特別帶咗該國獨有嘅野豬獠牙首飾帶嚟香港。

一開頭聽到用豬獠牙，黛安就聯想同殺象取牙嗰種唔人道嘅方法，但原來瓦努阿圖生產嘅野豬獠牙首飾，並唔係黛安諗咁樣，負責人話佢哋會等野豬死後才取出獠牙，在養殖野豬嘅過程要盡量保護獠牙，因為野豬一旦病咗，獠牙嘅質素就會受到影響，所以一般要從野豬取出獠牙，約需要7至8年，每年產量少於100件。

所謂物以罕為貴，Tal Milfirer透露，近5至6年不時有外地人到當地購買，價錢平均為2,000至3,000美元（即約1.55至2.3萬港元），獠牙生長愈耐，其圈狀一般會較圓、較多，價錢亦相對名貴㗎，今次又學到嘢！