黃友嘉瞓身股票基金 MPF賺近4成

強積金（MPF）常被打工仔視作「雞肋」，詬病回報「淨蝕」如同減人工。但黛安同積金局主席黃友嘉（David）食晏，David力撑話強積金並非「搵笨」，回報可以好好，仲好風趣利申︰「強積金真係個幾好嘅制度，咁講唔係因為我打緊呢份工㗎。」David話，強積金一推行已開戶口，16年來回報高達30％至40％，秘訣就係一直瞓身買股票基金。

買股票唔係好高風險咩？David就用坐飛機比喻︰「雖然飛機遇到氣流會有顛簸，但唔會影響飛行安全性。同理買股票基金會有波幅，但長遠趨勢都係賺。」佢仲話對好多中產嚟講，強積金只佔資產五分一，甚至十分一，既然嚿錢無得郁，不如全部投資喺回報成數高嘅股票上，「要應急我仲有其他投資或現金可應付。」不過，David都戴頭盔，講明投資取向人人唔同，唔係個個啱㗎。