$29吉野家歎牛肉飯 仲連飲品㗎！

29蚊食個Lunch？喺呢個物價飛漲嘅時代，一個Lunch閒閒地都要30幾蚊起，仲要唔包嘢飲，打工仔食晏要搵地方，要有位又要經濟超值，真係幾艱難。不過，黛安就收到風，吉野家由噚日起推出29蚊抵食午餐，逢星期一至五午市時段供應。哇！要即刻去試試先。

呢個「窮人恩物」午餐，有兩款口味任君選擇，包括海苔粟米牛肉或煎雞飯餐，以及海苔芝士煎雞或牛肉飯餐，無論鍾意日式定濃味嘅人都有得揀，仲配埋汽水、麵豉湯或日本茶，都係29蚊咋！提一提大家，套餐只喺20間指定分店出售（詳情見「香港吉野家」facebook專頁），唔好摸錯門釘啦。