50萬塊LEGO砌城堡 朗豪坊睇《美女與野獸》展

萬眾期待嘅迪士尼真人版電影《美女與野獸》下個月16日上映喇！電影入面有好多場經典場景都非常「吸睛」，特別係女主角貝兒與野獸定情嘅城堡，不其然會令人幻想有一天可以走入童話世界。黛安有個好消息！夢幻嘅城堡今個星期六（4/3）起呈現喺香港朗豪坊，香港迪士尼樂園、朗豪坊同LEGO今次合作，邀請到英國樂高藝術家Kevin，帶埋由50萬塊LEGO砌成嘅《美女與野獸》城堡來港，聽講今次係亞洲地區首個展出地點，認真榮幸呀！

原來Kevin來頭唔簡單，佢係不折不扣嘅LEGO嘅發燒友，過往30年砌過唔少令人讚嘆嘅LEGO，包括用15萬塊LEGO顆粒砌成嘅杜拜樂高樂園，同一幅高3.1米世界最大嘅杜拜國旗等，件件作品都花咗唔少心血同時間㗎，黛安非常佩服！

半年時間設計

講番今次座城堡，Kevin花咗半年時間設計，高2.2米，氣勢十足，單係圓拱形屋頂已經用咗4萬塊LEGO顆粒，真係巧奪天工！為咗趕及星期六同大家見面，Kevin即將來港進行組裝，再幫城堡內嘅機動旋轉舞池同LED吊燈做最後測試，希望畀大家見證貝兒與野獸翩翩起舞嘅浪漫之夜，大家mark實日子唔好錯過呀！