越南最好食牛肉粉 「錦麗」登陸apm

想食正宗越南牛肉粉？去觀塘apm啦！被《華爾街日報》譽為越南最好食嘅牛肉粉「錦麗」，登陸咗香港喇！太興老闆陳永安（Ken）噚日孖住囝囝、T-Factory總經理陳家強（Tommy）喺apm出席開幕禮，黛安亦有到場見證。Ken話本身同錦麗老闆劉全才互不相識，舊年3月到當地試食，對錦麗「一見鍾情」，經過11個月商談取得大中華區特許經營權，香港錦麗正式開張大吉，恭喜晒呀！

原來錦麗喺越南已有48年歷史，Tommy笑言舊年同一班香港師傅到當地「集訓」長達1個月，向劉老闆拜師學藝，將最原汁原味湯底帶返嚟，仲仿照越南竹帽為香港錦麗設計logo。佢介紹黛安必食鎮店之寶「綜合粉」，有生、熟牛肉同牛丸，最地道嘅食法係先飲湯底，再加入鴨舌草、九層塔、青檸、芽菜一齊食。果然湯底清甜，牛肉鮮嫩，河粉彈牙，驚喜十足！同場仲有大蝦紮肉米紙卷、蝦餅、小米糕等小食，大家記住試呀！

湯甜肉嫩 河粉彈牙

Ken透露香港錦麗嘅裝修費約200萬，主打年輕人路綫，有信心1年內收支平衡。據講錦麗已喺香港甲級商場物色緊舖位，將開多3、4間分店，連埋太興其他品牌食肆，今年將會喺中港兩地開多30間分店，仲會繼續引入東南亞其他餐飲！問Ken太興幾時上市，佢就話要考慮多陣先。黛安就祝佢生意蒸蒸日上，開多啲分店，等香港人食到特色美食呀！