國泰出自家手工啤 35000呎高空有得歎

近年黛安愛上手工啤酒，得閒無事都愛飲兩杯。最近國泰航空出咗一款會在高空35,000呎供應的自家手工啤Betsy Beer，前日國泰企業傳訊的Grace仲率先請黛安試飲，搞到我鬼咁開心，好想試下呢款啤酒，同平時飲開的有咩唔同。

聽阿Grace講，受高空環境及機艙壓力影響，乘客的味覺會變得無咁敏感，味蕾銳減約15％，所以平時大家享的飛機餐，調味會較地面膳食濃味一點。至於今次新出的啤酒，主要成分除咗啤酒花之外，仲加入不少富有本地色彩的食材，增加啤酒的層次感。第一啖入口，覺得甜甜哋、味道仲好清新，阿Grace話原來佢哋落咗龍眼落去，令味道更加圓潤豐富；另外亦喺釀製過程中，加入新界出品的永和蜂蜜，難怪會散發陣陣蜜糖的芳香。

據講支啤酒之所以叫Betsy Beer，原來係以國泰首架投入服務的DC-3客機「Betsy」命名。下個月1日至4月30日期間，大家乘搭國泰頭等及商務艙來往香港和英國，就有機會飲到。