20學生汕頭划艇到香港 誠哥親自去碼頭接船

有無諗過用8日時間，划艇由汕頭飄洋到港？20名汕頭大學划艇隊健將，今個月11日乘坐漢娜（Hannah）及茉莉花（Jasmine）號由汕頭出發，接力划艇，經過640公里航程，噚日中午終於抵達黃埔海濱喇！黛安都有去見證呢件開心事，仲見到汕大校董會名譽主席李嘉誠精神奕奕喺紅磡黃埔碼頭迎接學生！

用衞星追蹤動向

誠哥見到學生順利到港，更興奮得將外套脫下，只穿上一件短袖T恤！佢話自從划艇隊從汕頭出發，佢一直用衞星追蹤學生，睇到學生透過手機分享箇中點滴，覺得好感動；過程又令佢諗番起自己11歲由汕頭來港，當年為咗避開日軍，要先向北再向南走，路途曲折，未見過汪洋，沒經歷風浪，亦唔知邊度係彼岸，經歷1,000公里終於來到香港。多名划艇隊員分享8日海上之旅感受時，有隊員話在1年的訓練期間想過放棄，但一諗到活動本身的意義，不想辜負背後的支持者，憑呢種動力、意志令佢完成整個挑戰。誠哥藉此鼓勵學生「要有創新變革的勇氣和態度，擁抱未來」佢又強調，喺萬變嘅社會中，支持教育改革係佢不變嘅信念，會繼續為國家培養明日棟樑！