全港最高大「蜘蛛」 幫會展抹玻璃

香港會議展覽中心設計獨特，好似一隻趴喺維港中心嘅靈龜，用多塊大玻璃造成自然透光嘅效果，係香港地標之一。但要keep住塊玻璃閃令令真係要花唔少工夫！噚日黛安同會展管理公司董事總經理梅李玉霞（Monica）食飯，佢提到幫會展打掃一啲都唔容易，事關會展外形「三尖八角」，單係會展二期外牆同玻璃面積就約有32,000平方米，相當於4個足球場，做外牆清潔又複雜又耗時。不過最近佢哋買咗部全港最高、俗稱「蜘蛛」嘅高空工作台，支架可升到52米高，令負責高空清潔工作嘅同事多咗個好幫手。聽Monica講要做好呢項「極限工作」，除咗要夠膽量、有相關牌照外，最緊要「個天關照」，要按天氣、活動檔期等調節清潔日程。認真要向佢哋致敬！

現時會展管理公司有950名全職員工，最令黛安羡慕嘅係員工飯堂每日免費提供早、午、晚及宵夜4餐，節日更會「加餸」應節，福利認真好！