1萬名基層 獲派$300逛工展會

昨一輪冷鋒襲港，部分地區氣溫低至11度！但廠商會會長李秀恒（Eddy）居然笑笑口同黛安講香港「好溫暖」，點解？皆因佢剛從零下30幾度內蒙古返港。佢仲決定將呢份溫暖同香港人分享，所以廠商會今個禮拜六（31日）會舉行「回歸20載除夕樂歡欣」，廠商會由晚上十點起包場，讓一萬名基層人士入維園工展會掃貨，每人獲派發300蚊現金券，廠商會共贊助300萬，認真大手筆！Eddy話希望基層家庭可以喺參展商大劈價同無限送贈品下，以300蚊買到價值2,000蚊貨品，過一個豐盛新年，善款來自廠商會成立的「工展顯關懷」。

另外為慶祝明年香港回歸20周年，廠商會副會長戴澤良話，將於明年6月27日至7月2日，首次將工展會移師到北京舉行，展銷香港產品之餘，仲要將香港的工業成就展示畀京城同胞睇，預計會吸引到約50萬人次參觀。