迪士尼卡通甜品大師 擺甫士整餅 力求生動

黛安平時最鍾意去high tea，食好嘢之餘又可以影靚相，放上fb同姊妹炫耀吓。早排食咗幾件鐵甲奇俠、《星球大戰》白兵甜品，件件都栩栩如生，原來全部都係出自迪士尼甜品大師陸繼光之手。

陸師傅透露創作動畫甜品，秘訣就係要好似演員咁揣摩角色，將動畫睇到滾瓜爛熟、睇埋附加資料同細微動作，最後仲要角色「上身」，例如整Iron Man蛋糕時，就擺出Iron Man招牌動作，仲叫同事唔好怕醜齊齊擺，務求研發出來嘅甜品夠生動，吸引食客「相機食先」，話「如果相機唔食先，就好有問題啦」！

除咗賣相，佢話味道方面都要發揮創意去配合主題，例如Iron Man心口嘅弦反應能源器甜品，就特登用脆脆餡，等客人咬落去感受到爆炸的力量。

創作故仔 諗造型

如果主題唔係迪士尼動畫，佢就會自己諗故仔sell蛋糕，好似為咗迪士尼出年開幕、以「探索家」為主題嘅第三間酒店，佢就創作出一個探險家用放大鏡發現米奇島嘅故事，諗出地球、行李篋、望遠鏡造型嘅甜品。當中花嘅耐性、心思都唔嘢少，由構思到製成往往要2至3個月。如此認真，黛安佩服！