Taste of Hong Kong 3月舉行 門票今開賣

上年嘅亞洲區Taste美食節實在令黛安再三回味，相隔一年，「Taste of Hong Kong」宣布載譽歸來，主辦單位IMG同渣打銀行話第二屆嘅盛事將於明年3月16至19日喺中環新海濱舉行，規模比起第一屆擴展25％，會有更多本地同國際級佳餚，聽到呢到已經令黛安心心眼！

噚日黛安有口福，率先去咗迷你美食節試食8道菜式，我覺得當中野生牛心他他配蛋黃醬汁最為惹味！牛心肉其實好少機會食到，Rhoda大廚一直主張盡用動物所有部分，今次選用牛心肉味更濃郁，口感好爽口，配埋用啤酒酵母搓成嘅薄多士一齊食，味道更上一層樓。

IMG亞洲美食部總監Simon Wilson話，香港係今屆美食節亞洲區嘅首站，現時已經確定13間餐廳參與，其中5間餐廳首次參加，包括Kaum at Potato Head、Mercato、Okra、Rhoda同ZUMA，而港人熟悉嘅都爹利會館同天龍軒亦會再次參與。

早鳥優惠今早9點起於售票網Ticketflap發售，一般門票為108元（平日）及138元（周末）；貴賓門票賣548元（平日）及578元（周末），早鳥門票限量發售至明年1月31日。