年屆70容光煥發 楊永強日食一餐養生

昨日食lunch撞到前衞生福利局局長楊永強，嘩真係好耐無見過佢，原來佢約咗班朋友聚餐。睇見佢容光煥發，個個都爭住問佢點養生。無諗到佢居然話秘訣在於唔食飯。

「吓？唔食飯？」大家半信半疑。楊永強解釋其實唔係唔食飯，係每日只食一餐。原來佢並無食早餐及午餐的習慣，每日只食晚餐，仲要夜晚九點之後先食。大家問佢咁夜食咩啦？佢話有時會食下蔬菜、肉類、生果等等。日食一餐唔會好餓咩？佢話唔會，又引述野生動物都唔會定時定候一日三餐，所以一日一餐身體係可以調節到。後來至知，原來佢呢個飲食習慣已經維持咗20年，佢笑謂以前同醫管局同事開lunch meeting，個個掛住食飯、佢就負責講嘢咁話。

查實除咗日食一餐，楊永強日日都去游水，每星期仲會做Gym四個鐘，身形勁fit，難怪神采飛揚啦。不過佢都話：「呢個飲食習慣唔係最『健康』，應該要一日食三餐嘅！」