PMQ設旋轉波枱 360度打乒乓波

要感受藝術之秋，不用專登去藝術館的，行住街shopping一樣有新感悟。香港年度創意盛事deTour就喺PMQ搞咗個「創意滙聚十日棚」，除咗有工作坊同展覽，仲擺咗好多個新奇的藝術裝置與眾同樂，好似圓形的旋轉乒乓球枱，可以畀玩家360度係不同方向對打，邊個仲會話睇藝術嘢係悶蛋？個個觀眾都可以做「Game Changer」。另外仲有日本設計達人的墨象藝術裝置，觀眾不單可以睇，仲可以行入去水墨畫同書法當中。想去睇？記住係期間限定㗎，展期去到下個月4日咋。

如果錯過咗，都唔使怕，PMQ仲邀請咗建築藝術團隊LAAB搞咗個紙膠帶創意生活展，平時用來黏下簿仔的紙膠帶，原來仲可以將平實建築物變成玩味空間，仲有體驗區畀巿民齊齊黏膠紙整佳節明信片，下個月16日起就有得玩了。而專將車胎變成好玩嘢的環保組織「軸物行者」，都會幫手係中上環教大家點玩紙膠帶，實行令人人Stick with Joy﹗