金帆全場大獎罕有懸空 Grey Zenith同奪最佳廣告公司

講起賣廣告，好多人以為有錢就得，但實際吸引到人睇，絕對考驗廣告人的腦力同一個地方的文化軟實力，所以成功廣告絕對值得表揚﹗香港廣告商會（4As）剛過去星期五舉行一年一度金帆廣告大獎頒獎禮，頒發咗44個獎項，得獎公司比去年多咗，其中綜合項目金帆大獎由奧美（香港）廣告整的KFC《Finger Licking Good》奪得，佢哋用咗醬汁味指甲油帶出KFC炸雞好食到要吮手指咁美味，呢個概念連海外KFC都有用，名副其實係衝出國際。

KFC呢個廣告，連金帆大獎首席評審、廣告界大師勞雙恩都大讚，佢話見到好多廣告都好有創意玩味，但執行力都好重要，但略嫌KFC宣傳影片同其他配套關連性唔夠，未去到完美Level，所以今年金帆全場大獎（Grand Kam Fan）就從缺，公關姐妹話好多年都無試過，大家都好意外咁話。

至於年度最佳廣告公司大獎，分別由「創意科技類」的葛瑞（Grey）廣告香港及「媒體類」的Zenith攞咗。而創意香港仲會贊助部分得獎者去法國、新加坡同泰國競逐國際廣告獎，仲有機會為港爭光㗎！