搬廟要問天后娘娘 規劃署長最難忘

規劃署署長凌嘉勤（KK）今日開始退休前休假，佢昨日同傳媒茶敘話別，加入咗政府超過30年嘅KK，都處理過好多大家好熟悉嘅大工程，例如中環至半山嘅扶手電梯，就係佢出任港島規劃專員時期興建嘅。但講到最難忘項目，KK就話係東涌發展，赤鱲角村搬遷時，原來好峰迴路轉！

KK話當年發展東涌新市鎮，要遷移附近赤鱲角村嘅村民，期間傾到要搬遷村入面嘅天后廟，好多唔同意見。鄉委會話要搬去對住海嘅地方，但當時仲未填海，都唔知邊個位置有海景；有啲村民就建議應該搬上山，因為夠高就一定望到海，不過開路上山要斬好多樹，又唔太環保。KK建議不如搬個有河景嘅地方，村民最初反對，最後決定問天后娘娘！結果，村民問咗天后娘娘3次，3次都揀中KK建議嘅河景方案，村民亦都接受，最終搬遷天后廟就由海景方案，變成依家嘅河景方案。KK回想返，都話覺得好有趣。