渣打藝趣嘉年華 莎翁銅鑼灣出巡

「To be, or not to be.」係莎士比亞嘅不朽名句，早前財爺都巧妙用過來回應自己會否選下屆特首。昨日有班後生仔就決定「To be」，齊齊用行動紀念莎翁辭世400周年，成班人與英國同本地藝術家合作，喺「渣打藝趣嘉年華2016」活動，整咗個成4米高嘅莎翁木偶公仔，仲用埋莎翁名著《仲夏夜之夢》嘅角色做主題，整咗8座巨型燈籠木偶，又着埋發光服飾巡遊，當堂搞到成條希慎道到啟超道都夢幻晒，沿途圍觀嘅成千位巿民個個讚。

昨日約600個藝術家同學生又喺維園到東角道附近，用巡遊方式再演多次《仲夏夜之夢》；聽公關姐妹講，今次單係莎翁木偶已經用咗3個月時間整，啲同學仔真係落足心機。大會仲請咗國際知名保育專家兼聯合國和平大使珍古德博士（Dr. Jane Goodall）嚟，Jane見到啲木偶咁靚，即刻話後生仔最緊要相信自己潛能，盡情發揮長處咁話。