跟美心Martin食黑椒蟹 試星洲真滋味

早排美心中菜及m.a.x. concepts首席營運官李文賢（Martin）約去試菜，可惜當時我要到重慶出差，Martin話無論如何要等埋我，所以回來後，大家一齊到了潮江春食飯。去到先知，原來今次美心新推的菜式有我最鍾意的星洲黑胡椒蟹同辣椒蟹，真係開心啦。

今日Martin食得好少，何解？原來他說唔計試菜，已經和不同朋友食過8次啦！不過每次上菜，他都會用匙羮沾少少胡椒、醬汁試味，確保菜式味道次次出來都一樣，認真專業。

講起拆蟹，黛安之前在美國公司工作的時候，最愛到新加坡Long Beach食蟹，有次明明去緊機場返香港，經過東岸時忍唔住叫的士司機U-turn返去Long Beach，食埋隻蟹先走。

咁啱得咁蹺，今次潮江春的「星潮尋味」系列菜就找來客席師傅張偉忠，正正在Long Beach工作廿幾年，兩道菜均被新加坡列為「國菜」的辣椒蟹同黑胡椒蟹，都由他們的廚房創製，難怪味道同新加坡食到的一樣啦！

斯里蘭卡石蟹 爽實鮮甜

黑椒或辣椒蟹，一定要揀斯里蘭卡的石蟹，一來牠們的蟹蚶夠大隻，更重要是肉質爽實鮮甜、蟹味濃郁，食材日日由產地直送，保證新鮮。

仲有，原來所有入饌的食材，包括胡椒、辣椒、蒜頭等，統統由星馬進口，黑椒是馬來西亞沙撈越的出產。聽Martin講連煮辣椒蟹用的番茄醬和南薑花，都由新加坡直接運入，令調味更有層次，跟塊薄餅食就更滋味。是晚真係大滿足！