友邦歐陸嘉年華 12月開鑼 增360度旋轉玩意

適合一家大細去玩嘅友邦歐陸嘉年華又嚟喇！嘉年華將於12月中起一連兩個月在中環海舉行，雖然今次為期59天，比去年縮短約一星期，但依舊橫跨聖誕節、除夕、農曆新年，且內容比去年更新奇刺激，加入唔少新元素，聽落已經覺得吸引。

噚日同嘉年華公關姊妹傾開，初步打算開設26個機動遊戲，去年大受歡迎嘅海盜船、過山車、滑浪飛船、碰碰車、旋轉木馬今年再encore，仲新加入外國流行的Sizzler Twist，帶你感受360度旋轉快感。

《Trolls》毛公仔首亮相

友邦歐陸嘉年華舊年吸引100萬人次入場，嘉年華做過調查發現，入場以家庭客為主，除咗機動遊戲，今年仲會引入在全球嘉年華首次亮相、最新動畫電影《Trolls》的毛公仔，仲有Marvel、芝麻街、Minions、Super Mario等卡通人物超過100萬隻毛公仔，市民玩攤位遊戲之餘，帶埋得意又可愛毛公仔番屋企，睇嚟黛安要喺入嘉年華前做足「銀彈」準備。