日操6個鐘 克服負面情緒 曹星如打出存在感

所謂「行行出狀元」，黛安一直好欣賞「神奇小子」、本港首位職業西洋拳擊手曹星如（Rex），佢月初仲取得職業生涯20連勝。最近Rex接受馬會刊物專訪，提到自己打拳生涯24歲先開始，由第一場職業賽得300個觀眾睇，到最近一場有3,000人入場，證明一分耕耘，總有收穫！

讀書唔叻 曾失方向

今日掛滿「金腰帶」的Rex，少年時讀書冇方向感，鍾意打波、打機，好早就投身職場，做過搬貨、跟車、倉務等，17、18歲時獲拳擊教練邀請擔任助教，但因英文麻麻，就算有機會指導外國學生，基本溝通都應付唔到，感受至深，更加覺得要做好自己。佢話：「我讀書成績一向唔好，工作又冇專長或技能，不但冇人認同，甚至連自己都唔認同自己。」直至佢專注打拳，先至建立到「存在感」。

佢24歲先轉做全職運動員，起步比人遲，為追上進度，佢每日都狂操4至6小時，由於每場比賽通常只相距一、兩個月，佢要喺養傷與訓練之間取得平衡，亦有想過放棄。

不過，當佢諗到行內人人都經歷困難同辛苦，「只要堅持係可以捱得過，呢啲負面情緒成為很好經歷，令以後更加暢順。」Rex仲勉勵大家，有目標、方向，再辛苦也要堅持。大家又上一課了。