行山頂廣場 兼玩High-tech鬼屋

萬聖節同成班「嘩鬼」朋友聚頭，一齊玩開心得嚟都要夠恐怖至得！之前去山頂廣場玩嗰間鬼屋，驚嚇指數就爆晒錶喇。除咗有好陰森嘅小丑坐鎮，仲要戴住內置耳機嘅頭盔坐喺遊樂車上面入去，耳仔邊「鬼聲鬼氣」，傳嚟陰森小丑笑同埋電鋸聲，真係夠嚇人。

喺鬼屋度撞到嚟試玩嘅靚女藝人周秀娜都話，鬼屋用聲音導航夠晒刺激，仲話以前試過着白衫化紅唇粧上山頂廣場玩，嚇到啲途人唔敢跟佢搭纜車，聽落好啱做鬼屋員工喎！

公關姐妹就話，今年山頂廣場唔止有得驚仲有得影，玩完鬼屋仲可以攞番張嚇到「鼻哥窿都無肉」的「生死一剎」相，直情係「叫聲滿載驚嚇」﹗只要在商場買滿100蚊嘢就可以換到一張鬼屋入場券，夠晒抵玩。唔想咁驚，就可以去康怡廣場嘅紅鼻嘩鬼遊樂場，同小朋友喺神秘古堡門口或同南瓜搖搖板影下相，仲係免費架。依家兩個活動都開始咗，去到31號咋，約朋友同家人又有好去處啦！