一億橫財夢

「買咗六合彩未？如果3月2號唔見我返工，唔使搵我，因為我將會帶埋啲錢遠走高飛……」噚日辦公室內笑聲滿載，人人都沉醉於一億中獎夢中，無心工作。

食晏時，同事紛紛走去投注站買飛仔，我無執輸，用我和男友生日同拍拖結念日，買咗10蚊雞。我小心翼翼將飛仔攝入銀包，突然Tommy仔走來拍我膊頭問：「Denise，畀你中咗一億會點用？」

「梗係買樓啦，同埋……」Tommy仔無聽完我講就搶住話：「我都係，一層我同老婆仔自住，一層畀阿爸阿媽，另一層畀外父外母，諗落一億都唔係好多。」「一億又點止買到三層樓咁少呀？」「咁中咗六合彩梗係買豪宅啦！」佢哈哈哈笑咗幾聲，然後又跑去問第二個中獎後有咩打算。

其實我幾年前都好似Tommy仔咁，幻想橫財到手後要環遊世界、買豪宅，盡情享樂，暴發戶通常都有類似想法。但錢花光後又點？近年睇多咗書，學識理財第一步係唔好令消費膨脹，其次要增加被動收入。若然真係畀我中咗一億，我可能會用三、四千萬買十個細價盤：一個自住，九個收租；餘下做其他投資，實現未圓嘅夢想。學星爺話齋：人無夢想，同鹹魚有咩分別？（本欄逢周三、四刊登）